MÊRDÎN - Parlamentera DEM Partiyê Bêrîtan Guneş di çalakiya nobetê ya li dijî êrişên ser Bakur û Rojhilatê Sûriyeyê li ser sînorê Nisêbîn-Qamişloyê hatiye destpêkirin de axivî û wiha got: “Bendava Tişrînê bendava mirovahiyê ye. Em ji bo aştî û jiyaneke birûmet nobetê digirin.”
Li dijî êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê, bi pêşengtiya DBP, TJA û DEM Partiyê li ser sînorê Nisêbîn a Mêrdînê û Qamişloyê çalakiya nobetê hat lidarxistin. Endamên Meclisa Dayika Aştiyê, nûnerên rêxistinên girseyî yên demokratîk û gelek welatî tev li bûn. Girseya ku bi dirûşman ve ber bi parka ser sînor ve meşiya, li ser sînor govend gerand û tililî avêt. Piştre jî daxuyanî hate dayin. Di daxuyaniyê de pankarta “Bi ruhê seferberiyê em ê Şoreşa Rojava biparêzin” hate hilgirtin û dirûşmên “Bijî berxwedana Rojava” “Bijî berxwedana Tişrînê”û “Jin jiyan azadî" hatin berzkirin.
‘ROJAVA MESELEYA MAN Û NEMANÊ YE’
Parlamentera DEM Partiyê ya Mêrdînê Bêrîtan Guneş di daxuyaniyê de wiha got: “Heta ku statuya Rojava tê naskirin û gel azad dibe dê nobeta me bidome. Rojava, meseleya rûmetê û man û nemanê ye. Rojava, avakirina jiyana nû ya bi pêşengtiya jinê ye. Peymana gel a Rojava, pemana herî pêşketî ya cîhanê ye. Lê îro êriş ser tên kirin. Li wir navê berxwedanê Tişrîn e. Heke ev bendav nebe ne ceyran ne jî av dibe. Bi van êrişan dixwazin gelê Rojava bifetisînin. Êrişên ser Bendava Tişrînê, sûcê mirovahiyê ne. Heke bendav hilweşe dê bi hezaran kes di bin avê de bimînin. Dê xelk neçarî koçberiyê bibe. Dê ceyran tune be. Gelên Kurd, Ereb û Tirkmen li wir jiyanê diparêzin. Lê li ser wan bombeyan dibarînin. Ma xwişk-biratî ev e? Hûn çima naxwazin gel bi hev re bijîn? Ev bêtehemûliye çima?”
‘BENDAVA TIŞRÎNÊ BENDAVA MIROVAHIYÊ YE’
Bêrîtan Guneş, axaftina xwe wiha qedand: “Dijminatiyê li hebûna kurdan, li xak û ava wan dikin. Divê ev dijminatî bi dawî bibe. Ên li wir şehîd dibin, gelê me ye. Êşa wan di dilê me de ye. Ji bo çareseriyê gav biavêjin. Destê aştiyê dirêj bikin. Gelê Kurd bi komkujî û qirkirinan xelas nabe. Ma we hêj fêm nekiriye? Em pêşengtiya Rojhilata Navîn dikin. Bila ev şer êdî bisekine. Bendava Tişrînê bendava mirovahiyê ye. Ên li dijî van sûcan bêdeng dimînin, şirîkên komkujiyê ne. Em ji bo aştî û jiyaneke birûmet nobetê digirin. Ji bo kesên li Tişrînê nobetê digirin vê nobetê digirin. Lewma vî şerî bi dawî bikin û deriyên Îmraliyê vekin.”
Piştî axaftinan, ji bo Rojava çalakiya rûniştinê ya 5 deqeyan hat lidarxistin. Daxuyanî, bi dirûşman bi dawî bû.