Êrişên Tirkiyeyê û çekdarên girêdayî wê yên Artêşa Netweyî ya Sûriyê (SNA) li derdora Bendava Tişrîn a Bakur û Rojhilatê Sûriyeyê ji 8'ê Kanûnê ve berdewam dikin. Di êrişên Tirkiyeyê yên bi Balafirên Hewayî yên Çekdar (SÎHA) û balafirên şer, rojnamevan, siyasetmedar, hunermend û zarok jî di nav de gelek kes jiyana xwe ji dest dan. Piştî rojnameger Nazim Daştan û Cîhan Bîlgîn, lîstikvanê şanoyê Bavê Teyar jî di êrişan de hat qetilkirin. Li gorî SOHR’ê heta niha 40 sivîl di êrişan de hatine kuştin û bi dehan jî birîndar bûne.

 

'MAFÊ JIYANÊ HAT BINPÊKIRIN'

 

 

Endamê Lijneya Rêveberiya Baroya Amedê Baver Mîizrak hedefgirtina sivîlan di êrişên li dijî Bakur û Rojhilatê Sûriyeyê de nirxand. 

 

Mizrak, anî ziman ku hedefgirtina cihên sivîlan, çavkaniyên binerd û ser rûyê erdê, çavkaniyên av û enerjiyê sûcê li dijî mirovahiyê ye û got: "Ev di çarçoveya sûcên şer de tên nirxandin. Dema em li medya civakî û dîtbarî dinêrin, êrişên li ser konvoyan ku pir eşkere ye sivîl in tên kirin." 

 

Mizrak hedefgirtina rojnameger Cîhan Bîlgîn û Nazim Daştan bi bîr xist û got ku hem mafê jiyanê, hem jî mafê şîn û definkirinê yê rojnamegeran hatiye binpêkirin. Mizrak anî ziman ku destûr nehatiye dayîn malbat cenazeyan bînin Tirkiyeyê jî û got: "Di vê çarçoveyê de mafê xatirxwestinê yê malbatan hat astengkirin. Ev jî mînakeke din a binpêkirina hiqûqê ya di çarçoveya hiqûqa navneteweyî de ye."

 

Mizrak diyar kir ku ji ber êrişan metirsiya rûxandina Bendava Tişrînê heye û got: "Bendava Tişrînê yek ji mezintirîn bendavên Sûriyeyê ye û bendava ku çavkaniyên av û enerjiyê yên herêmeke berfireh di xwe de dihewîne. Dibe ku li vir bibe sedema karesatên mezin."

 

'DIVÊ ÊRIŞ BÊN SEKINANDIN'

 

Mizrak wiha got: "Ev rewşa aloz di heman demê de îstiqrara nisbî ya li Sûriyeyê jî asteng dike. Berdewamiya vê rewşê dibe sedem ku rêxistinên wekî DAIŞ'ê bi hêz bibin. Her wiha dibe ku bibe sedema koçkirina bi deh hezaran kesî çêbike. Her wiha ev dibe ku fikra kesên dixwazin ji Tirkiyeyê biçin Sûriyeyê biguherîne. Ev yek wê bibe sedema ji nû ve destpêkirina pêvajoyê. Ev yek wê di gelek xalan de bibe sedema krîzên mezin û karesatên mirovî. Lewma divê êrişên li ser Rojavayê bi taybet li derdora Bendava Tişrînê demildest bên rawestandin."