Parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder di 28’ê kanûnê de bi Rêberê PKK’ê Abdullah Ocalan ê li Girtîgeha Girtî ya Ewlekariya Bilind a Tîpa F a Îmraliyê di bin tecrîdeke giran de tê girtin re hevdîtin kirin. Piştî hevdîtinê 7 xalên têkildarî nêzîkatiyên Abdullah Ocalan hatin eşkerekirin. Abdullah Ocalan bal kişand ser xurtkirina biratiya tirk-kurdan û berpirsyariyeke dîrokî ye. Her wiha bang li partiyên muxalefetê jî hat kirin û wiha got: "Ji bo serketina pêvajoyê, pêwîst e hemû derdorên siyasî yên li Tirkiyeyê bêyî ku bikevin nava hesabên teng û demkî bi înîsiyatîf tevbigerin û bi awayekî erênî tevkariyê bikin. Ji zemînên herî girîng ên van tevkariyan jî bêguman wê Meclis be." Abdullah Ocalan got: "Ez amade me me ji bo avêtina gaveke erênî ya pêwîst. Dem dema aştî, demokrasî û biratiyê ye ji bo Tirkie û herêmê." 

 

Serokên DEVA, Partiya Gelecek û partiya Saadetê yên Amedê peyamên Abdullah Ocalan nirxandin.

 

Serokê DEVA Partiyê yê Amedê Remzî Kaymak diyar kir ku ew li peyamên Ocalan neyînî nanêrin. Kaymak got: "Em bawer dikin ku em ê vî şerê ku 40 sal in dewam dike, bi biratî û aştiyê biqedînin." Kaymak destnîşan kir ku ji bo vê jî ji destê kê çi tê divê bike û got:" Ji lew re vî welatî ji ber neçareserkirina vê pirsgirêkê gelek tişt winda kirine. Êdî divê ev yek li ser zemîneke qnaûnî bê bicihkirin û çareserkirin. Û di vî warî d eçi dikeve ser milê kê divê bike." 

 

Kaymak bilêv kir ku tiştekî erênî ye ku wekî navnîşan meclis hatiye nîşandan û got: "Li Meclisê kurd jî hene û her kes jî hene." Kaymak got ku ew di vî warî de amade ne ku çi bikeve ser milê wan bikin.

 

DIVÊ NEYÊ TALOQKIRIN

 

Serokê Partiya Gelecekê yê Amedê Aydin Aytaç jî got: "Pêşveçûna erênî ya vê pêvajoyê û çareseriya pirsgirêka kurd ji bo me di nav mijarên herî girîng de ne. Ocalan kesekî ku di vê mijarê de xwedî înîsiyatîf e. Li ser rêxistinê serweriya wî heye û di pozîsyona ku kare talîmatê bide rêxistinê de ye. Xwezî di 2013-2015'an de ev pirsgirêk biqediyaya, loê hat heta roja îro. Lewma divê ev firsend baş bê bikaranîn."

 

Aytaç anî ziman ku hêz û pêkhateyên ku çareseriyê naxwazin hene û wiha dewam kir: "Hem hikûmet, hem dewlet û hem jî Ocalan divê îradeyeke pir xurt nîşan bidin. Dibe ku provokasyon çêbibin, berxwedan jî pêş bikeve. Li hember van divê amadekarî hebin."

 

Aytaş destnîşan kir ku divê ev pirgsirêk neyê taloqkirin û di wext de bê çareserkirin. 

 

'EM Ê PIŞTGIRIYÊ BIDIN HER GAVEKE BÊ AVÊTIN'

 

Serokê Saadetê yê Amedê Abdurrahman Ergîn jî got: "Ji polîtîkayên înkar û asîmîlasyonê heta hemwelatiya wekhev, ji zext û desthilatdariyê heta maf û azadiyan, ji tundî û pevçûnan heta aştî û diyalogê, ji pêkanînên dijhiqûqî heta dewleta hiqûqê em piştgiriyê didin her gava ku bê avêtin."

 

Ergîn diyar kir ku divê maf û azadî nebin cihê bazariyê û got: "Divê mirov ne lis er esasên berjewendiyê, bi dilpakî nêzî meseleyê bibe." 

 

Ergîn diyar kir ku divê di serî de Meclis û bi giştî hemû partiyên muxalif, rêxistinên civaka sivîl û tevahiya civakê daxilî nava pêvajoyê bibe û got ku ew amade ne piştgiriyê bidin he rgaveke tê avêtin. 

 

MA / Mujdat Can