DERSIM - Hat diyar kirin ku li Mazgêrdê, Muzaffer G. ê xwestiye tacîzî jina sewalên xwe diçêrandin bike, hat binçavkirin. Piştî lêpirsîna li Midûryeta Polîsan G. hat berdan. 

 

Hat ragihandin ku di hefteya derbasbûyî de li gundê Goman ê navçeya Mazgêrda Dersimê, Muzaffer G. hewl daye tacîzî jina sewalên xwe diçêrandin bike. Di dema hewldana tacizê de jina sewalên xwe diçêrandin kiriye qîrîn û gundiyên ku dengê wê bihîstine çûne cihê bûyerê. Niştecihên  gund mûdaxeleyî tacîzkar dikin û agahî didin Cendirmeya Darikentê. Muzaffer G. ê di saetên şevê de hat binçavkirin, piştî îfadeya wî hat girtin, serbest hat berdan. 

 

LÊPIRSÎN HAT DESTPÊKIRIN 

 

Hat zanîn ku derbarê bûyerê de lêpirsîn hatiye destpêkirin. Nûnerên jinan ên sazî û partiyên siyasî yên Dersimê bertek nîşan dan û ketin nava tevgerê. Jin ji bo derbarê bûyerê  de agahî bigirin çûn gund û bi jinên gund re hevdîtin pêk anîn. 

 

JINAN BERTEK NÎŞAN DA

 

Nûnerên saziyên jinan û partiyên siyasî yên Dersimê, di saet 13.00’an de li gundê Goman daxuyanî dan çapemeniyê û xwestin Muzafer G. gund biterikîne.