NAVENDA NÛÇEYAN - Rageşiya di navbera Hindistan û Pakistanê de tund dibe. Pakistanê ragihand ku ew ê lijneya asta herî jor a ku bikaranîna çekên nukleer kontrol dike, kom bike.

 

Rageşiya ku 22’yê Nîsanê di navbera Pakistan û Hindistanê de destpê kirî, ji 6’ê Gulanê ve bi êrîşên her du aliyan didome. Pakistanê ragihand ku di saetên siharê de Hindistanê bi fuzeyan 3 êrîş pêk anîn û ev êrîşên li dijî baregehên leşkerî hatine astengkirin. Pakistanê jî diyar kir ku weke bersiva van êrîşan, êrîşî 4 balafirgehên li Hindistanê kiriye.

 

‘GELEK SÎHA HATIN XISTIN’

 

Di daxuyaniya ji aliye artêşa Hindistanê ve hatî dayîn de, hate ragihandin ku bi êrîşên balafirên bêmirov ên Pakistanê re rageşî zêde bûye. Wezareta Parastinê ya Hindistanê duh daxuyanî da û diyar kir ku Pakistanê bi SÎHA’yên Tirk re êrîş pêk anîn. Di daxuyaniya îro hatî dayîn de jî hate diyarkirin ku gelek SÎHA’yên ku êrîş pêk anîne, hatine xistin.

 

LIJNEYA NUKLEERÊ WÊ KOM BIBE

 

Ji ber ku her du welêt jî hêzên nükleerin, fikar zêde bûn. Sînyala şerê nükleer ji Pakistanê hat. Wezîrê Parastinê yê Pakistanê eşkere kir ku lijneya asta herî jor a ku bikaranîna çekên nukleer kontrol dike (Otorîteya Fermandariya Neteweyî) wê kom bibe. Di daxuyaniya artêşê de hate diyarkirin ku civîn li ser daxwaza Serokwezîrê Pakistanê Şehbaz Şerîf wê îro were lidarxistin.