NAVENDA NÛÇEYAN - Yekîtiya Ewropayê (YE), li dijî paşketina demokratîk a li Tirkiyeyê gaveke tund avêt û civînên fermî betal kir.

 

Sê saziyên bingehîn ên Yekîtiya Ewropayê (YE) Konsey, Komîsyon û Parlamento biryar dan ku civînên fermî yên li Enqere û Antalyayê plan kirine, betal bikin. Pisporan diyar kirin ku ev gav weke nerazîbûneke şênber a li hemberî geşedanên demên dawî yên li Tirkiyeyê ye.

 

Di dîroka YE’yê de cara ewilî Konsey, Komîsyon û Parlamento li dijî Tirkiyeyê di asta hişyariyê de peywendî betal kirin. Li Tirkiyeyê girtina şaredaran, zextên li dijî rojnamevan û muxalîfan û binpêkirina hêmanên dewleta hiqûqî weke “ne li gorî nirxên YE’yê” hate pênasekirin.

 

Di civîna giştî ya roja Sêşemê ya Parlamenta Ewropayê (PE) de paşketina demokratîk a li Tirkiyeyê û girtina Şaredarê Bajarê Mezin ê Stenbolê Ekrem Îmamoglû hate nirxandin. Di rûniştinê de daxuyaniya herî balkêş, ji aliyê Endamtiya Berpirsyariya Pêşketinan a Komîsyona Ewropayê Marta Kos ve hate dayîn.

 

Kos got: “Em ji welatekî endamê YE’yê, li benda standartên demokratîk ên herî bilind in. Girtina Îmamoglû ya ji beriya namzetiya serokkomariyê, pirsên cidî bi xwe re tîne.”

 

Kos bang kir ku mudaxileyî protestoyên li Tirkiyeyê neyê kirin. Kos her wiha bal kişand ser girîngiya jeopolîtîk a Tirkiyeyê û endamtiya wê ya ji NATO’yê re û got, “Qutkirina qenalên hevkariyê, feyde nade ti kesê.”

 

Li PE’yê komên siyasî yên cuda jî Tirkiye rexne kirin. Demokratên Xiristiyan (EPP) ragihand ku civîna Komîsyona Parlamentê ya Têkel a Tirkiye-YE’yê betal kirine ku dihat plankirin 14-15’ê Nîsanê ev civîn bê lidarxistin.

 

Raportorê PE’yê yê Tirkiyeyê Nacho Sanchez Amor bi gotina “Tirkiye ji rê derdikeve” nerazîbûn nîşan da.

 

Liberalan (Renew) bêdengiya YE’yê rexne kir.

 

Keskan ev bang kirin: “Divê peyameke zelal ji Tirkiyeyê re were şandin.”