AMED - Endama Lijneya Rêveberiya Navendî ya DBP'ê Ayşe Çelîkbîlekê diyar kir ku yek ji muxatabê banga dîrokî dewlet e û divê êdî gavan biavêje û got ku divê bi pêkanîna "mafê hêviyê" şert û mercên Abdullah Ocalan bên başkirin.
Zêdetirî mehek di ser "Banga Aştî û Civaka Demokratîk" ya ku di 27'ê Sibatê de ji aliyê Rêberê Gelê Kurd Abdullah Ocalan ve bi Şandeya Îmraliyê hat kirin re derbas bû. Heya niha dewlet tu gav neavêtine, lê li gel vê Kurdistanî û dostên wan li qadan xwedî li bangê derketin.
Endama Lijneya Rêveberiya Navendî ya Partiya Herêmên Demokratîk (DBP) Ayşe Çelîkbîlek pêvajoyê nirxand.
'XWEDÎ LI BANGÊ HAT DERKETIN'
Ayşe Çelîkbîlekê banga Abdullah Ocalan wekî manîfestoyekê nirxand û got: "Bi vê bangê re çareseriya pirsgirêkên li Kurdistan, Tirkiye, Rojhilata Navîn û cîhanê derket holê. Yek ji girîngtirîn balkişandina di bangawaziyê de jiyana hevpar bû. Gelê kurd bi piştgirîkirina banga Rêberê Gelê Kurd berpirsyarî hilgirt."
BERPIRSIYARIYA DESTHILATÊ
Ayşe Çelîkbîlekê destnîşan kir ku divê desthilat û dewlet jî gavên berbiçav bavêjin û bertek nîşanî tecrîda li Îmraliyê da. Ayşe Çelîkbîlekê destnîşan kir ku hêviya herî mezin a gelê kurd rawestandina operasyonan û pêkanîna "mafê hêviyê" ye û got: "Divê rewşa hemû girtiyan bi taybetî girtiyên nexweş ên di girtîgehê de bê ronîkirin. Ji ber ku em dibînin ku ji aliyê dewletê ve gaveke rast nehatiye avêtin, fikareke wekî 'Em ê pêvajoyeke wekî ya 2013'an bibînin' heye. Tê payin ku pergal û dewlet gavan bavêjin."
MAFÊ HÊVIYÊ
Ayşe Çelîkbîlekê wiha berdewam kir: "Pêwîst e şert û mercên xebatê yên Rêberê Gelê Kurd biguherin ku bi partiya xwe, bi çapemeniyê, bi gelek derdoran re vê pêvajoyê gengeşe bike û fikirên xwe parve bike. Niha bendewariya herî mezin ev e. Lê hê jî ji bo 'mafê hêviyê' tu gav nehatine avêtin. Heya niha gelek bedêl hatin dayîn. Em bawer dikin ku dê pirsgirêk bi 'Banga Aştî û Civaka Demokratîk' çareser bibin. Ji bo avakirina bangê em ê bixebitin. Em jin çi bikeve ser milê me em amade ne."
MA / Mujdat Can