Meşa Meclisa Ciwanên Partiya Wekhevî û Demokrasiyê ya Gelan (DEM Partî) a ji Amedê ber bi Navçeya Amara ya navçeya Xelfetî ya Rihayê ve bi boneya 76'emîn rojbûna Rêberê Gelê Kurd Abdullah Ocalan di roja 2'yem de dewam dike. Meşvanên Amarayê ji derketina Sêwrega ya Rihayê dest bi meşê kirin û gihîştin Curnê Reş. Meşvan li vir bi kulîlk, tilîlî û dirûşmeyan û bi pankarta "Roja li Amarayê hilat li Îmraliyê bilind dibe" hatin pêşwazîkirin.

 

Meşa ciwanan a bi dirûşmeya "Em bi civaka demokratîk ber azadiyê ve dimeşin" hat destpêkirin, gihîşt navçeya Curnê Reş a Rihayê. Şêniyên navçeyê, bi dirûşmeya "Bijî Serok Apo", bi çepik û tilîliyan ciwan pêşwazî kirin. Hevşaredarên Curnê Reş û Parlamentera Rihayê Dîlan Kûnt Ayan jî di nav de welatiyan bi kulîlkan ciwan pêşwazî kirin. Ciwan li seranserê Kolana Îzollû Bozan Bey meliyan. Di meşaê de ku pankarta "Roja li Amarayê hilat li Îmraliyê bilind dibe" hat vekirin, ciwanan stranên şoreşgeriyê gotin. 

 

SERDANA GORISTANÊ HAT KIRIN

 

Ciwan, piştî meşê li Goristana Asrî ya Curnê Reş serdana gorên kadroyên pêşeng ên PKK'ê yên di navbera salên 1970-1980'yî de jiyana xwe ji dest dan Cûma Tak, Salih Kandal, Emîn Yazar, Halîl Çavgûn, Sûltan Yavûz, Hanim Kaya, Fîdan Kaya, Berfîn Yetkîn kirin. Xwişka Saliha Kandal Aynur Kandal û Parlamantera DEM Partiyê ya Mêrdînê Berîtan Guneş Altin jî tevlî serdana goristanê bûn. Di serdanê de ji bo kesên ku di têkoşîna demokrasî û azadiyê de jiyana xwe ji dest dane rêz hat girtin. 

 

Di serdana goristanê de beşdar kulîlk danîn ser goran.  

 

Ciwanên ku bernameya xwe ya îro temam kirin, sibê dê derbasî Taxa Alîgor a navçeya Pirsûsê ya Rihayê bibin.