ENQERE -  Parlamenterê HDP’ê Sezaî Temellî diyar kir ku budçeya şer li ser dijminatiya kurdan li civakê tê ferzkirin û ji bo çareseriya pirsgirêka kurd divê tecrîd bê rakirin. 

 

Li Desteya Giştî ya Meclisê hevdîtina li ser budçeyên wezaretan tên kirin. Parlamenterê HDP’ê yê Wanê Sezaî Temellî li Desteya Giştî ya Meclisê axivî û budçeya ji şer re tê veqetandin nirxand. 

 

‘WE VÎ WELATÎ TALAN KIR’ 

 

Temellî anî ziman ku budçeya 2023’yan kurteya 20 salên AKP’ê nîşan dide û wiha got: “Îktidar bi feraseta xwe ya aboriyê nêzîkatiya xwe ya siyaset û civakê dide nîşan dan. Di serî de mafê budçe, ewlehiya xebatê û sendîkayî her cûre maf hatiye desteserkirin. Îro asta em gihîştinê ne krîza aborî ye, hilweşandina aboriyê ye. Ev hilweşandin ne di rojekê de hatiye diyarkirin. Encama polîtîkayên çewt a 20 salan e. Tiştên ku hûn hin dikin li ber çavan e. Budçeya şer li ser dijminatiya kurdan li civakê ferz dikin.” 

 

‘BI TECRÎDÊ RE NEÇARESERKIRINÊ KÛR KIRIN’ 

 

Temellî da zanîn ku îktidar bi tecrîdê neçareserkirina pirsgirêka kurd kûrtir kiriye û got: “Hilweşandina ku îktidarê pêk aniye bi restorasyonê jî pêk nayê. Îktidar ev 20 sal in dînamîtê dixe bine aştiya civakî û cihêkariyê jî asayî kirine. Di encama van 20 salan de talan û hilweşandinek mezin pêk anîn. Hemû pirsgirêk di bin pirsgirêka kurd de veşartî ne. We bi neçareserkirina pirsgirêka kurd temenê îktidara xwe dirêj kir. We bi pergala tecrîda li Îmraliyê neçareserkirinê kûr kir. Hiqûqa tecrîdê tê belavkirin. We hemû welat mehkûmî bêhiqûqiyê kiriye. We mirovên siyaseta demokratîk hefs kir. Heke tecrîd bê rakirin wê pirsgirêka kurd bê çaresrkirin. We li ser dijminatiya kurdan civakê ji bo van xerckirinan qanih dikin. Her hûn dikin li ser pêya bimînin lê hûn çi jî bikin wê bi ser nekeve.”