MÛŞ - Ahmet Karagoz ku piştî 30 salan ji girtîgehê derket, got: "Divê qanûn werin derxistin da ku hatina gerîla misoger bibe. Nexwe, ev biratî dê çawa were avakirin? Ez bawer dikim ku ew ê ev çêbibe."

 

Ahmet Karagoz (56), piştî ku di sala 1994'an de hat girtin, cezayê muebedê lê hat birîn. Di 1'ê Tebaxa 2024'an de ji Girtîgeha Girtî ya Ewlekariya Bilind a Çorlûyê serbest hat berdan. Di dema girtinê de ew di gelek girtîgehan de maye. Her wiha li van girtîgehan gelek nexweşî jî lê peyda bûne ku fitiq, ulser û nexweşîna madeyê hin ji van nexweşîna ne. 

 

Karagoz, yek ji wan kesan e ku "Pêvajoya Aştî û Civaka Demokratîk" a ku ji bo çareserkirina pirsgirêka kurd hatiye destpêkirin ji nêz ve dişopîne û difikire ku divê di vê pêvajoyê de ewilî girtiyên nexweş bên berdan.

 

'DÊ PÊVAJO BI SER BIKEVE'

 

Karagoz diyar kir ku ew ji bo serkeftina pêvajoyê baweriya xwe bi Rêberê Gelê Kurd Abdullah Ocalan tîne û got: "Xebata ku rêberê me (Ocalan) dike rê li ber pêvajoyê vedike. Ew moral, coş û heyecanê dide me. Ez jî hewl didim ku beşdarî pêvajoyê bibim. Her çi dibe bila bibe, jixwe wekî din tu şanşekî me yê din tune ye." 

 

Karagoz destnîşan kir ku serkeftina pêvajoyê dê bandorên erênî li ser Tirkiye û Kurdistanê bike û got ku ev bawerî bi peyama bidîmen ya Abdullah Ocalan xurttir bûye. Karagoz got: "Ez ji Rêbertiyê bawer dikim. Rêbertî ne dixapîne û ne jî tê xapandin. Ew ê pêvajoyê bigihîne serkeftinê."

 

‘AŞTÎ YEKALÎ NABE'

 

Karagoz, gotina Serokê Giştî ya MHP'ê Devlet Bahçelî ya "Aştî, ne çûkeke yekbaskî ye" bi bîr xist û bal kişand ser pêwîstiya sererastkirinê qanûnî. Karagoz got: "Kesên ku li çiyayan pev diçin nikarin werin û bikevin girtîgehê. Di vî warî de, divê hemû gelê Tirkiyeyê tevkariyê bike û zextê li hikûmetê bike. Ev ji bo avakirina biratiyê pêwîst e. Bila êdî xwîna xwişk û birayan nerije."

 

Karagoz bal kişand ser rewşa girtiyên nexweş jî û got: "Ji bo vê yekê ne hewce ye ku qanûnên nû werin derxistin. Qanûn jixwe dibêjin ku 'girtiyên ku nikarin bi tena serê xwe bijîn divê werin berdan.' Hevalekî min ê bi navê Engîn hebû; her du destên wî tune bûn. Bi salan e di girtîgehê de ye. Hûn çawa dikarin kesekî bêdest di girtîgehê de bihêlin? Dibêjin, 'Destên wî tune ne, lê mejî heye.' Ma divê ew bê mejî be ku were berdan? Gavên ku Rêber Apo îro avêtine, divê bêyî qanûnan bihatana bicîhanîn. Divê ew zû qanûnan derxînin û hatina gerîlayan misoger bikin. Wekî din, ev biratî dê çawa were avakirin? Ez hêvî dikim û ez bawer dikim ku ew ê bibe."