Komîsyona Çandinî û Ekolojiyê ya Partiya Wekhevî û Demokrasiyê ya Gelan (DEM Partî) ji bo tespîtkirina pirsgirêkên cotkaran li Agiriyê civînan li dar dixe. Endamên komîsyonê, li gundên Çamûrlî, Navik, Balûlik, Aşqele, Iranos û Darebîya Jêrê bi cotkaran re hatin cem hev. Endama Komîsyona Çandinî û Ekolojiyê ya DEM Partiyê û Parlamentera Agiriyê Nejla Demîr ku beşdarî civînan bû, civînan nirxand.

 

 

Nejla Demîr a ku pîşeya wê ya rastî endezyariya çandiniyê ye, anî ziman ku ev zeviyên ku bi hezaran sal in bi mîlyonan mirov têr kirine, di encama polîtîkayên şaş de êdî têra pêdiviyên rojane jî nakin. Nejla Demîrê diyar kir ku ev polîtîkayên şaş bi zanebûnî hatine meşandin û got: "Polîtîkayên çandiniyê yên li Kurdistanê tên meşandin, polîtîkayên çandiniyê yên şaş in ku bi zanebûnî tên meşandin. Pêwîst e em ji vir û pê ve polîtîkaya çandiniyê ya li Kurdistanê çareser bikin. Cotkarên me bi du awayan ji warên xwe hatine dûrxistin. Ya yekem, gel ji malên xwe hatin koçberkirin. Şewitandian bi hezaran gundan, bi polîtîkayên ewlehîparêz qedexekirina bi hezaran zozanan, rasterast mirovan ji cotkariyê dûr xist. Rêbaza duyan jî, bi zanebûnî polîtîkayên şaş e." 

 

Nejla Demîr da xuyakirin ku divê polîtîkaya çandiniyê bi şêweya berhemê ya li ser esasê herêmê bê afirandin û got ku pêwîst e li gorî van polîtîkayan, çandiniya hin berheman were teşwîqkirin.

 

Nejla Demîrê da zanîn ku bi van polîtîkayên çandiniyê yên dewletê gel ji axa xwe tê dûrxistin û koçî metrepolan dibe. Nejla Demîrê got: "Li Kurdistanê qadên çandiniyê yên mezin hene ku bi bereket in. Tu kîjan tovê biçînî jî di nava çend rojan de şîn dibe. Lê belê bi van polîtîkayên bi zanebûnî ên şaş ên çandiniyê re, rastiyeke ku gelê me yê ku koçî metropolan bûye heye. Li metropolan mirovên me wekî hêza erzan a karî tên xebitandin." 

 

Nejla Demîrê da zanîn ku ji bo balê bikişînin ser polîtîkayên çandiniyê yên şaş û li dijî wan gavan biavêjin bi cotkaran re civînan li dar dixin û wiha got: "Em wekî fikra partiyê xwedî nêzîkatiyeke bingehîn in. Em dixwazin zemîneke hevpar ava bikin ku hilberîner neyên çewisandin. Ji bo axa neyê dagirkirin, ekolojî neyê texrîbkirin û xweza neyê qirkirin û ji bo jiyaneke nû em tevdigerin. Em hewl didin jiyaneke ku mirov terka axa xwe neke ava bikin." 

 

Nejla Demîrê bilêv kir ku bi sedan gundên Agiriyê hene û got ku ji bo guh li pirsgirêkên cotkaran bikin û çareserî derkeve meydanê û cotkar xwe birêxistin bikin hevdîtinan bi cotkaran re dikin. 

 

Nejla Demîrê bilêv kir ku di encama hevdîtinan de planên wekî kooperatîfê derketine holê û got ku ew hewl didin li Agiriyê kooperatîfeke ku cotkara di nav de bin ava bikin.