Recep Hantaş (20) li Parka Sumerê ya li navçeya Bajarê Nû ya Amedê di 14’ê nîsana 2019’an de bi şev kaxezan kom dikir. Polîs bi demançeya xwe êrişî Hantaş kiribû û ew kuştibû. Dadgeha Cezayê Giran a Amedê der barê polîsê kujer Kazim Bozkurt de biryara beraetê dabû. Dadgeha Îstînafê ya Amedê biryara beraetê xera kiribû. Danişîna doza Hantaş ji nû ve li 7'emîn Dadgeha Cezayê Giran a Amedê hat lidarxistin. Îro danişîna duyemîn hat lidarxistin û polîsê kujer beşdarî danişînê nebû û parêzerên malbata Hantaş, Mehmet Oner û Serokê ÎHD'a Amedê Ercan Yilmaz û parêzer Yakûp Guven beşdarî danişînê bûn. 

 

Bersûc ango kujer daxwaznameyek nivîskî şand dadgehê û îdia dike ku ne wî Recep Hatnaş kuştiye û nizane ji aliyê kî ve hatiye kuştin. Parêzeran xwest bersûc ji sûcê "kuştina bi qestî" were cezakirin. 

 

Lê tevî parastin û daxwaza parêzeran jî şandeya dadgehê biryara "hewceyî bi ceza nîne" ango "cihê cezakirinê nîne" der barê kujer ango polîs de da.