MEREŞ - Di merasîma cenazeyê Alev Koçê de ku li Mereşê bi îşkenceyê hat qetilkirin, dayika wê Cenet Koçê, got: "Edî em ê mudaxile bikin. Bes e ji vê zilma hovane re, bes e!"

 

Alev Koç, di 11'ê Sibatê de li navçeya Bazarcix a Mereşê ji aliyê zilamê bi navê Huseyîn Subaşi ve bi îşkenceyê hatibû qetilkirin. Cenazeyê Alev Koçê îro ji Cemxaneya Narliyê hati girtin û li taxa Çokyaşarlar a Elbistanê, bajarê wê yê jidayikbûnê, hat veşartin. Piştî qetilkirinê, Huseyîn Subaşi li Dîlokê teslîm bû, sûcê xwe îtîraf kir û hat girtin û ew şandin girtîgehê.

 

Îro li Bazarcixê ji bo Alev Koçê meşek hat lidarxistin. Rêxistinên jinan û gelek welatî beşdarî merasîma cenaze bûn. Dema ku jinan cenazeyê Alev Koçê li ser milên xwe hilgirtin, gelek caran dirûşmeyên wekî "Jin, jiyan, azadî" û "Qetilkirina jinan siyasî ye" hatin berzkirin. Aktivîstên Tevgera Jinên Azad (TJA) jî beşdarî merasîmê bûn.

 

Şîlan Şîpar, keça Alev Koçê, di merasîma cenaze de axivî û daxwaza edaletê ji bo dêya xwe kir û got: "Dayika min bû qurbana kuştina jinan. Divê kuştin û tundiya li ser jinan raweste. Dêya min jî yek ji wan bû."

 

Dayik Cennet Koçê bûyerê ne tenê wekî kuştina jinan, lê wekî şerekî li dijî jinan bi nav kir û got: "Divê kuştina jinan tavilê raweste. Her tişt xirabtir dibe. Ev nikare berdewam bike! Em hemû li derve ne; zarokên me, neviyên me, mezinên me, em hemû li derve ne. Edî em ê mudaxile bikin. Bes e ji vê zilma hovane re, bes e!"