
Dr. Koç: Nebûna xizmeta tenduristiya bi zimanê zikmakî mafê tenduristiyê binpê dike 

2019-11-22 10:18:57


	AMED – Dr. Şemsettîn Koç anî ziman ku pêwîste nexweş di zimanê pê dizanin de teşhîs û dermankirina xwe bînin ziman û salên dirêj ji ber nexweşan bi tirkî nizanibûn nediçûn nexweşxaneyan û mafê wan tenduristiyê dihat binpêkirin.&nbsp;

	&nbsp;

	Dr. Şemsettîn Koç bal kişand ser pirsgirêka zimanê kurdî ya li qada tenduristiyê. Koç destnîşan kir ku dayîna xizmeta bi zimanê zikmakî yê kurdî ya li qada cemaweriyê mafek gerdûnî ye û bi taybetî di qada tenduristiyê de nebikaranîna kurdî bandorek neyînî li ser tenduistiya gel dike. Koç da zanîn ku xizmeta tenduristiyê ya bi zimanê zikmakî bi mafê jiyanê re bûye yek û got: “Daxwaza xizmeta tenduristiya zimanê zikmakî parçeyek ji mafê tenduristiyê, mafê dermankirinê, mafê nexweş û mafê jiyanê ye. Ev maf ji hev nayên veqetandin. Însanên bi tirkî nizanin dikevin rewşek dezavantajî.”&nbsp;

	&nbsp;

	‘NEBÛNA XIZMETA TENDURISTIYA BI KURDÎ BANDORÊ LI SER TENDURISTIYÊ DIKE’&nbsp;

	&nbsp;

	Koç da zanîn ku ziman hêmana sereke ya xwegihandina xizmeta tenduristiyê û bandora qalîteyê ye û ziman bandorê li ser têkiliya bijîşk û nexweş dike. Koç anî ziman ku di teşhîs û dermankirina nexweşan de divê nexweş bi zimanek jê re hakim be dikaribe xwe îfade bike û yên bi tirkî nizanin ji bo vê yekê naçin nexweşxaneyan. Koç diyar kir ku di encama polîtîkayên pişaftinê yên dewletê de li bajarên herêmê ji ber qedexeya ser zimanê zikmakî û astengiyên li pêş însanan bi salan nikaribûn derdê xwe ji bijîşkan re bêjin. Koç da zanîn ku nexweş bi israr kurdî diaxivin û bijîşk jî bi tirkî bersivê didin ev yek rê li ber xetereyan vedike.&nbsp;

	&nbsp;

	DI NAVA 17 ZIMANAN DE ZIMANÊ KURDÎ NÎNE&nbsp;

	&nbsp;

	Koç anî ziman ku daxuyaniyên hikumetê yên rakirina qedexe û astengiyên ji ser kurdî rastiyê nade nîşandan û li Tirkiyê bi 17 zimanan xizmeta tenduristiyê tê dayîn û di nava van 17 zimanan de kurdî nîne. Koç da zanîn ku pêwîste xwedî li mafê tenduristiyê yê zimanê zikmakî bê derketin û dayîna xizmeta tenduristiyê ya bi zimanê zikmakî bi qasî dayîna xizmeta tenduristiyê girîng e.&nbsp;

	&nbsp;

	MA/ Lezgîn Akdenîz

	&nbsp;