Li Mêrsînê panela aştiyê: Êdî ne dema axaftinê dema gavavêtinê ye 

2025-11-30 14:46:28


	MÊRSÎN - Wekîlê DEM Partiyê Alî Bozan di 10’emîn Pirtûka Fuaran a li Mêrsînê de tev li panela “Axaftina li ser aştiyê” bû û got: “Êdî dema avêtina gavan e. Ev meseleye, meseleya Tirkiye û Rojhilata Navîn e.” 

	 

	Di 10’emîn Fuara Pirtûkan a Mêrsînê de panela “Axaftina li ser aştiyê” hat lidarxistin. Wekîlê DEM Partiyê yê Mêrsînê Alî Bozan, Cîgirê Serokê Giştî yê Partiya DEVA’yê û Wekîlê Mêrsînê Mehmet Emîn Ekmen û îlahiyatvan-niv^skar Muhammed Salar weke axêver tev li panelê bûn. Panel, li Parka Sayayê hat lidarxistin û gelek kes tev li bûn. 

	 

	Muhammed Salar di panelê de got ku wî gelek mînakên tecrûbeyên aştiyê yên li cîhanê dîtine lê ya girîng ew e ku modelên li Rojhilata Navîn cuda bin. Salar, got: “Mijareke weke aştiyê biqedir, li Rojhilat Navîn bêyî olê tam cihê xwe nabîne. Em nikarin oleke mîna Îslamê ya mayinde paşguh bikin. Gelo diyanet di xutbeyên xwe de behsa aştiyê dike, terîqet, cemaet behsa aştiyê dikin? Tenê bi lêkolînkirina mînakên li cîhanê dibe ku heman encamê nede. Xetên sor ên her kesî hene. Di Îslamê de xetên sor nabin. Ya dikeve ser milê me ew e ku em pêvajoya aştiyê bikin wesîleya pêşxistina demokrasî, azadî û rakirina astengiyên li pêşiya zimanê dayikê.” 

	 

	'DIVÊ EM PIŞTGIRIYÊ ZÊDE BIKIN’

	 

	Ekmen jî got ku hêj jî civak fêm nake bê Serokê Giştî yê MHP’ê Devlet Bahçelî bi kîjan motîvasyonê nêzî pêvajoyê bûye û ev tişt anî ziman: “Ferqa vê pêvajoyê ya ji pêvajoyên di ew e ku Ocalan tevî sedemên vê pirsgirêkê hêj li holê jî ne bi gavekî pir pêşverû û şoreşger biryara fesixkirina rêxistinê da. Mînakeke wiha li dinyayê nîne. Nêzikatiya kesekî mîna Bahçelî ku dewletperest û neteweperest e, dike ku em vê pêvajoyê ji yên din cuda bigirin dest. Hêj jî baweriyeke tam ji bo pêvajoyê nîne. Rêxistin dibêje dewlet jidil nîne, dewlet jî berevajî vê difkire.” 

	 

	Bi domdarî Ekmen, kirin û gotinên îktîdarê bi bîr xist û neçûna Îmraliyê ya partiyên muxalefetê girêdayî vê hincetê kir. Ekmen, got heke pêvajo bi ser keve dê destkeftiyeke mezin be û divê her kes ji bo vê bixebite. Ekmen, got: “Heta pirsgirêkên esasî ji holê ranebin dê Îmrali-DEM Partî nekarin pêvajoyê bimeşînin. Ocalan dibêje ‘xwezî CHP jî bihata.’ Li pêşiya me hêj pêvajoyeke dirêj heye. Divê em piştgiriyê zêde bikin.” 

	 

	'DEMA AVÊTINA GAVÊN PRATÎK E’

	 

	Alî Bozan jî di panelê de got ku êdî divê tenê axaftin neyên kirin û wiha domand: “Divê hemû derdorên civakê xwedî li pêvajoyê derkevin. Li her tax û malê divê pêvajo were nîqaşkirin. Dema wê ye ku aştiya rasteqîn bikeve meriyetê. Her tiştek li ser hate axaftin lê pratîk tune ye. Dema avêtina gavên pratîk e. Ev meseleye êdî meseleya Tirkiyeyê ye, meseleya Rojhilata Navîn e. Divê hemû derdorên civakê destê xwe deynin bin kevir. Ya esasî divê baweriya ji bo pêvajoyê were xurtkirin. Tişta li ser vê xakê veguheriya wijdana hevpar a gelan, edalet e. Heke li gorî vê tevbigerin dê pirsgirêk çareser bibe. Birêz Ocalan û Bahçelî gavên wêrek avêtin. Divê serokkomar û muxalefet jî heman cisaretê nîşan bide. Ev çareserî, ji fikarên dengdan gelek biqîmettir e. Girîng e ku partiyên di komîsyonê de li dijî nêrînên Ocalan derneketin. Rêbaza vê, hevdîtina rû bi rû ye.” 

	 

	Panel, piştî pirs û bersivan bi dawî bû.