Mitînga KESK'ê ya Wanê: Ne ji şer, ji aştiyê re budçe 

2025-11-29 16:02:28


	 

	WAN – KESK'ê bi dirûşmeya “Em nikarin debara xwe bikin” mitîngeke herêmî li dar xist. Di mitîngê de girîngiya aştiyê hat destnîşankirin. Parlementer Berîtan Guneş Altin ku di mîtîngê de axivî got: “Em ê têkoşîna xwe bidomînin heta ku em welatekî azad ji bo gelê xwe, ji bo jinan û ji bo karkeran biafirînin.”

	 

	Konfederasyona Sendîkayên Karkerên Kamûyê (KESK) li Wanê bi dirûşmeya “Em nikarin debara xwe bikin” li Parka Aştiyê ya Mûsa Anter mîtîngeke herêmî li dar xist. Girse, bi meşê derbasî qada mitîngê bû. Di dema meşê de girseyê dirûşmeyên wekî “Jin, jiyan, azadî”, “qeyûm dê biçin, em dê bimînin”, “bijî berxwedana kedkaran” û “qeyûm talan e berxwedan jiyan e” berz kirin. Di mîtîngê de pankartên “Em nikarin debara xwe bikin, ji bo gel budçe welatekî demokratîk”, “Em budçeyeke kedparêz, gelparêz û aştîxwaz dixwazin” û “budçeyek li ser bingeha wekheviya zayendî, demokratîk û alîgirê aştiyê”hatin vekirin û dowizên “Rojîn Kabaîş” û “em aştiyê dixwazin, ne şer” hatin rakirin. Ji Colemêrg, Amed, Sêrt, Mêrdîn, Bedlîs, Agirî, Qers, Îdir, Dersîm û Şirnexê gelek kedkarên girêdayî KESKê bi cilên sendîkaya xwe beşdarî mîtîngê bûn. Her wiha saziyên demokratîk, Meclîsa Dayikên Aştiyê, TJA, DÎSK Genel-Îş û gelek welatî jî tev li mitîngê bûn.

	 

	Mitîngê, ji bo cangoriyên demokrasiyê bi deqeyekê rêzgirtinê dest pê kir. Berdevkê Platforma Şaxan a KESK'ê ya Wanê Şemsettîn Bakir li ser navê Komîteya Amadekar axivî û bal kişand ser pêvajoya Aştî û Civaka Demokratîk a ku ji hêla Rêberê Gelê Kurd Abdullah Ocalan ve di 27ê Sibatê de hatiye destpêkirin û girîngiya aştiyê ya li ser qada kedê destnîşan kir.

	 

	Piştre, Parlamentera Partiya Wekhevî û Demokrasiyê ya Gelan (DEM Partî) ya Mêrdînê Berîtan Guneş Altin axivî û destnîşan kir ku welat di nava qeyranên mezin re derbas dibe. Berîtan Guneş Altinê da zanîn ku divê budçe ne ji bo şer, ji bo gel bê veqetandin û diyar kir ku Rêberê Gelê Kurd Abdullah Ocalan pêvajoyek daye destpêkirin. Berîtan Guneş Altin anî ziman ku ev pêvajo ji bo jin, ciwan û tevahiya civakê hatiye destpêkirin û got: “Birêz Ocalan li dijî pergala ku keda ciwan û jinan îstîsmar dike, perspektîfeke nû pêşkêş kir. Her çend vê pêvajoyê ji bo hemû gelan hêvî anîbe jî, budçeya 2026an hêviyên gel şikandiye. Her çend di vê heyamê de divê ji bo jin, zarok û ciwanan budçeyek were amadekirin jî, em dibînin ku budçeya 2026an ne ji bo gel, lê ji bo şer û mîlîtarîzmê tê veqetandin. Budçeya ku ji bo mirinê hatiye veqetandin, divê ji bo ciwanan bê veqetandin.”

	 

	‘DIVÊ EM DENGÊ KARKERAN BIBIHÎZIN'

	 

	Berîtan Guneş Altinê bi lêv kir ku civak ji her aliyê jiyanê ve ji zarokan bigire heta ciwanan û jinan di krîzê de ye û ev tişt anî ziman: “Divê em li dijî vê krîzê dengek yekgirtî bilind bikin. Em budçeyeke ji bo gel û welatekî demokratîk dixwazin. Em welatekî ku zarokên karker lê werin qirkirin naxwazin. Hikûmet dema amadekirina budçeyê dike bi gel, jin an jî ciwanan naşêwire. Ew tenê ji kapîtalîstan dipirse û budçeyê bi wan re amade dike. Ger em dixwazin welatekî demokratîk ava bikin, divê em dengê karker, jin û ciwanan bibihîzin. Hevdîtina komîsyonê ya bi Abdullah Ocalan re girîngiya diyalogê nîşan dide. Ez her kesê ku ji bo budceyeke wekhev li ber xwe dide silav dikim. Em ê têkoşîna xwe bidomînin heta ku em welatekî azad ji bo gelê xwe, ji bo jinan û ji bo karkeran biafirînin.”

	 

	Piştre, Hevserokê Giştî yê KESKê Ahmet Karagoz axivî û ev tişt got: “Em budçeyek dixwazin ku aştî û demokrasiyê di nav de heye. Em bi çepik û tilîliyan budçeya ku ji bo dirêjkirina temenê desthilatdariya siyasî hatiye amadekirin, protesto dikin. Çavkanî mîna avê ber bi patronan û şer ve diherikin, lê ji me karker û jinan re tê gotin ku çavkanî tune ne. Çavkanî hene, lê cem van ar, şerm û wijdan nîne. Ji bo kesên ku gundên wan hatine valakirin, ji bo kesên ku îradeya wan ji hêla qeyûman ve hatiye desteserkirin, erka me ye ku em vê tarîtiyê ji van axan derxînin.”

	 

	Piştî axaftinan rapbêj Barody û komeke herêmî ya Wanê Koma Kûçeband derketin ser dikê û ji bo kedkaran stranên xwe gotin. Kedkaran li ber stranan govend gerandin.

	 

	Mitîng, piştî konser û govendê bi dawî bû.