Mazlum Ebdî: Sûriye dê nebe Sûriyeya beriya 2011’an 2025-08-31 11:07:01 NAVENDA NÛÇEYAN - Fermandarê Giştî yê HSD’ê Mazlum Ebdî, diyar kir ku divê êdî Sûriyeyeke demokratîk, nenavendî û piranîparêz were avakirin û got: “Şerê 14 salan ji bo Sûriyeyê bes e. Sûriye êdî dê nebe Sûriyeya beriya 2011’an.”    Fermandarê Giştî yê Hêzên Sûriyeya Demokratîk (HSD) Mazlum Ebdî, ji “Konferansa Niştimanî ya Ciwanên Rojavayî” re peyameke bidîmen şand. Ebdî, têkildarî rewşa dawî agahî da.    Ebdî, destnîşan kir ku dibe agirbesta li Bakur û Rojhilatê Sûriyeyê bi dawî bibe û wiha got: “Ev çendek meh in li Bakur û Rojhilatê Sûriyeyê agirbest û îstîqrar heye lêbelê peymanên mayinde hêj nehatiye kirin. Îxtîmal heye ku pevçûn dîsa dest pê bikin.”    ‘TEKANE RÊ PERGALA NENAVENDÎ YE’   Ebdî, wiha domand: “Hêvîdarin pevçûn dîsa dest pê nekin. Saziyên me her tim ji bo parastina gelê me amade ne. Em dixwazin hevdîtinên aştyê bi ser kevin. Divê şerê navxweyî yê Sûriyeyê ku 15 sal in didome êdî bi dawî bibe. Tekane rêya çareseriyê ya pêşerojê, Sûriyeyeke nenavendî ye. Xebatên di vê mijarê de didomin. Ji bilî vê tu çareseriyên din bo Sûriyeyê nînin. 14 salên şer ji bo Sûriyeyê bes in. Êdî divê pergaleke demokratîk, nenavendî û piranîparêz were avakirin. Divê hemû gel xwe di Sûriyeya nû de bibînin. Dê Sûriye venegere rewşa xwe ya beriya 2011’an.”