
Aslan ê 94 salî her roj ji Kerboranê tê ser sînor û tev li berxwedanê dibe 

2025-01-08 11:28:41


	MÊRDÎN - Haci Şukru Aslan ê 94 salî, her roj ji navçeya Kerboranê tê ser sînorê Qamişloyê û beşdarî çalakiya nobetê ya li ser sînor dibe. Aslan, wiha got: “Îro rêberekî me heye, Kurd bi ser ketine.”&nbsp;

	Çalakiya nobetê ya li dijî êrişên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê li ser sînorê Nisêbîn a Mêrdînê û Qamişloyê hatiye destpêkirin, di roja 27’an de didome.&nbsp;

	&nbsp;

	Yek ji kesên beşdarî çalakiya nobetê dibe jî Haci Şukru Aslan e. Aslan, 94 salî ye û he roj tevî sermayê û temenê xwe yê mezin jî ji Kerboranê berê xwe dide cihê nobetê. Aslan, dema di temenê xwe yê 20 salî de yek ji şopdarên Mele Mistefa Barzanî bû û di demên piştre de jî siyaseta xwe li ser xeta tevgera azadiyê ya Kurd domand. Gundê wan Dîlan, di sala 1990’î de hate şewitandin û valakirin. Li ser vê yekê koçî navenda navçeyê anku Kerboranê kir. Aslan, rêxistina Partiya Demokratîk a Gel (HADEP) bi dilxwazî ava kir û li Kerboranê bû yek ji damezirînerên fermî yê kevneşopiya siyasî ya Kurd. Tevî temenê xwe yê mezin jî tev li nobeta li ser sînorê Qamişloyê dibe. Aslan, di dema êrişên DAIŞ’ê yên li ser Kobanê de li Pirsûsê, di dema qedexeyên derketina kolanan ên li bajarên bakurê Kurdistanê de di nava meşên li Botanê de cih girt û di hemû çalakiyên li dijî êrişên ser Kurdan hatin lidarxistin de cih digire.&nbsp;

	&nbsp;

	DI 70 SALIYA XWE DE RÊXISTINA NAVÇEYÊ AVA KIR&nbsp;

	&nbsp;

	Aslan, da zanîn ku tevî zextan jî di salên 200’î de li Kerboranê Rêxistina HADEP’ê ava kirine û wiha got: “Me serî li ber gefan û zextan netewand. Di wan salan de li Kerboranê partî tune bû. Piştre partî hate wê derê, xwendin û nivîsandina min tune bû lê min jê re got; ‘Heke hûn qebûl bikin ez dikarim bikim. Bila partiya me jî li Kerboranê bê vekirin. Heke kesek nebe ez amade me.’ Welhasil, li kesekî xwendin û nivîsandina wî heye geriyan lê piştre ez kirim serokê navçeyê. Piştre jî pêvajoyên binçavkirinê dest pê kirin.” Aslan, got ku tevî temenê xwe yê mezin jî herî dawî 2 sal û 6 meh cezayê hefsê û cezayê pereyan lê hatiye birîn.&nbsp;

	&nbsp;

	‘ÎRO RÊBERÊ ME HEYE’

	&nbsp;

	Aslan, anî ziman ku yek kêliyê jî xwe ji têkoşînê paşve nedaye û wiha got: “Ez îro jî xwedî heman fikrê me. Îro rêberê me heye. Em tevek piştgiriyê didin wî. Me neheqî li kesekî nekiriye lê gelek li me tê kirin. Em ji bo mirovahiyê, aştiyê û yekitiyê têdikoşin.”&nbsp;

	&nbsp;

	‘KURD ÊDÎ BI SER KETINE’

	&nbsp;

	Aslan, axaftina xwe wiha qedand: “Mîna her kesî em jî doza xwe ya rewa diparêzin. Xaka li Sûriyeyê xaka Kurdan e. Xaka me kirine çar parçe û dane Iraq, Îran, Sûriye û Tirkiyeyê. Îranî her roj Kurdan bidarve dikin. Ma Kurd ne mirov in? Kî li dijî vê zilmê derkeve kesên herî bişeref ew in. Dê aştiya Rêberê me ji bo her kesî baş be. Kurd, miletekî qedîm in. Ji ber zilma lê dihat kirin Rêberek ji nav wan derket. Kurd êdî bi ser ketine. Mizgîniya min a ji bo her kesî ye, Kurdistan dê azad bibe. Ev, bûyereke dîrokî ye. Gotina em xwişk û bira ne, bila mirov neyên kuştin, gotineke xweşik û birûmet e. Em vê jî erênî dibînin. Heke aştiyê bixwazin, wê demê bila şer bidin sekinandin. Ewqas ciwan dimirin. Heke muzakere bikirana dê baş bûya lê nakin. Şer hêj bêhtir sor dikin. Em bi vê sedemê li vir in. Gelê me tişta baş û xweşik dixwaze, tişta nebaş naxwaze.”&nbsp;

	&nbsp;

	&nbsp;MA / Ahmet Kanbal - Omer Gungor

	&nbsp;