Keskîn Bayindir: Berxwedana me ya li kolanan dê bidome

2024-11-07 12:13:57


	MÊRDÎN - Hevserokê Giştî yê DBP’ê Keskîn Bayindir meşa li Mêrdînê ya li dijî qeyûm de axivî û wiha got: “Gelê kurd dê berxwedana xwe ya li kolanan a li dijî van polîtîkayan bidomîne.” 

	Wezareta Karên Hundir di 4’ê mijdarê de qeyûm tayînê li Şaredariya Bajarê Mezin a Mêrdînê û şaredariyên Êlih û Xelfetî ya Rihayê kir. Çalakî û bertekên li hemberî tayînkirina qeyûman didomin.  Di roja 4'emîn a tayînkirina qeyûm a li Şaredariya Bajarê Mezin a Mêrdînê de Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) ji Şell Petrolê heta avahiya şaredariyê meşiyan. Di meşê de ku Hevserokê Giştî yê DBP’ê Keskîn Bayindir, Hevşaredarên Bajarê Mezin ên Mêrdînê Devrîm Demîr û Ahmet Turk û gelek kes amade bûn. Di meşê de dirûşmên "Be Serok jiyan nabe", "Bijî berxwedana Mêrdînê", "Mêrdîn a me ye şaredarî ya me ye" hatin berzkirin. Her wiha sirûda "Herne peş" hate gotin. Girse hat ber avahiya şaredariyê û li wir daxuyanî da.

	 

	‘EM Ê BERXWEDANA XWE BIDOMÎNIN’

	 

	Di daxuyaniyê de ji ewil Hevşaredar Devrîm Demîr axivî û wiha got: “Îro me çavên xwe bi nûçeyek nû ya qeyûm vekir û 418 kes ji kar hatin derxistin. Îro careke din me dît ku çavê qeyûm li ser sifreya gel e. Tu wateyek din a qeyûm nîne. Careke din me dît ku mesele ne şaredarî ye. Mesele ew e ku kurd bila pariyek nan nexwin. Naxwazin kurd li ser axa xwe tiştekî bixwin. Di her du demên berê de jî dizî û talana wan bi rêya çapemeniyê ji raya giştî re parve kir. Careke din em van biryaran bi tundî şermezar dikin. Heta em maf, şaredarî û saziyên xwe bigirin em ê berxwedana xwe bidomînin. Di bin her şert û mercî de em ê li vir bin. Em dizanin ku em mafdar in. Em ê bi ser bikevin."

	 

	'EM Ê SERÊ XWE LI BER WE NETEWÎNIN’ 

	 

	Hevserokê Giştî ya DBP'ê Keskîn Bayindir jî diyar kir ku beriya niha qeyûm tayînî şaredariyan hatibûn kirin lê di mijara parastina vîna gelê kurd de gav paşve navêtine. Bayindir wiha dewam kir: "Dixwazin em dev ji welatparêzî û zimanê xwe berdin, lê gelê Mêrdînê dê vîna xwe biparêze. Gelê Kurd her roj li dijî zilma we vîna xwe diparêze. Ya ku derdikeve holê tenê dijminatiya we ye. Armanca we tenê ev e, lê vê baş bizanibin, em ê tu carî serê xwe li ber we natewînin. Ji Asyaya Navîn, Kurdistanê heta Tirkiyeyê bi sedan kes piştgiriyê didin vê berxwedanê. Berxwedana me berxwedana li dijî bêhiqûqiyê ye. Yê ku ji dîrokê heta îro û paşerojê wê têk biçe, ne vîna me ye. Gelê me li hemû bajaran li dijî vê zilmê li ber xwe dide û vê rewşê qebûl nake. Ev meseleya hebûn û tunebûnê ye. Ji ber vê yekê em ê li hemberî vê yekê serê xwe bilind bikin û em ê bi ser kevin. Ev berxwedaneke bi nirx e. Ev berxwedan rêya azadiyê heye. Baweriya me bi vî gelê qehreman heye. Ev feraseta Erdogan û Bahçelî wê ji holê rabe.”

	 

	Herî dawî Keskîn Bayindir gotinên Serokomar Tayyîp Erdogan ên "Em destên xwe dirêjî kurdan dikin" bi bîr xist û destnîşan kir ku destên dirêjkirî ne destên aştiyê ne û wiha bi lêv kir: “Dirêjkirina dest tê wateya destdirêjkirina vîna gelê kurd e. Heta ew polîtîka hebin wê gelê kurd jî li ber xwe bide."

	 

	Piştre Hevşaredarê Bajarê Mezin ê Mêrdînê Ahmet Turk axivî û bal kişand 418 kesên ku ji şaredariyê ji kar hatine derxistin û got: "Ez qeyûm pîroz dikim, we bi betalkirina 418 kesan welat rizgar kir."