
‘Ma di destên dayikan de çek hebûn?’ 

2021-03-06 15:29:01


	&nbsp;

	ÊLIH - Meclîsa Dayikên Aştiyê ya Êlihê, bertek nîşanî girtina rêveberên MEBYA-DER’ê Meryem Soylû ya 79 salî û Hatûn Aslan a 71 salî da û pirsa “Ma di destên dayikan de çek hebûn?” kir.

	&nbsp;

	Meclîsa Dayikên Aştiyê ya Êlihê, têkildarî girtina rêveberên MEBYA-DER’ê Meryem Soylû ya 79 salî û Hatûn Aslan a 71 salî yên di operasyona li dijî saziyê de hatibûn girtin, li avahiya meclîsa xwe daxuyanî da. Endamên Meclîsa Dayikên Aştiyê, Berdevka Meclîsa Jinan a HDP’ê Ayşe Acar Başaran, Hevşaredara Êlihê ya ku qeyûm tayînî cihê wê hatibû kirin Songul Korkmaz û aktîvîstên TJA’yê beşdarî daxuyaniyê bûn. Di daxuyaniyê de, endama Meclîsa Dayikên Aştiyê Sûltan Azboy axivî.&nbsp;

	&nbsp;

	‘EM ŞERMEZAR DIKIN’

	&nbsp;

	Azboy, diyar kir ku girtina dayikan nîşan dide ku dewlet hatiye çi astê û wiha got: “Tenê sûceke dayikan heye, ew jî israrkirina daxwaza aştiyê ye. Ma di destên dayikan de çek hebû? Dixwestin ku mirov nemirin û tu kes bêhiqûqî neyin girtin. Bi girtina dayikan bêhiqûqiyeke din li ewqas bêhiqûqiyan zêde bû.”

	&nbsp;

	‘EM Ê LI BERXWE BIDIN’

	&nbsp;

	Azboy, destnîşan kir ku ew ê li dijî êrîşên ser xwe têkoşîna xwe mezin bikin û ev peyam da: "Em soz didin girtiyan. Em ê têkoşîna wan a li derve hiştine berdewam bikin. Ew li hundir em jî li derve em ê li dijî bêhiqûqiyên tên jiyîn li ber xwe bidin. Bila ev wisa bê zanîn.” Azboy, xwest bêhiqûqiyên tên jiyîn bên bidawîkirin û bang li raya giştî û daraza navnetewî kir ku li dijî pêkanînên tên jiyîn dengê xwe derxin.

	&nbsp;

	&nbsp;