Berdevka HDP'ê Gunay: Operasyona KCD'ê kumpas e 

2020-07-03 13:41:40


	 

	ENQERE - Berdevka HDP'ê Ebrû Gunay, operasyona li dijî KCD'ê û siyasetmedarên kurd rexne kir û anî ziman ku operasyona li dijî KCD'ê kumpas e û wiha got: "FETO'yiyan dosyayên KCK'ê wekî kumpasê girtin dest. Niha AKP jî bi heman rêbazê dixwaze KCD'ê bike kumpas. 

	 

	Berdevka Partiya Demokratîk a Gelan (HDP) Ebru Gunay, li Navenda Giştî ya HDP'ê têkildarî geşedanên dawî civîna çapemeniyê li dar xist. Gunay ewil 33 kesên di komkujiya Sêwasê de û 57 kesên di komkujiya Çorumê de hatin qetilkirin bibîr anî û wiha got: "Heta ku bi van komkujiyên li ser vê axê pêş ketin re neyên rûqayî hev, mixabin pêşeroja demokratîk a civakan nayê avakirin." 

	 

	Gunay, ewil operasyona li dijî KCD'ê rexne kir û wiha got: "Ev operasoynên kumpasê yên kriminalizekirinê ne. KCD ji bo pirsgirêka Kurd bi rêbazên demokratîk û aştiyane bê çareserkirin ava bû. 13 salin vê têkoşîna ji bo aştî u demokrasiyê dide. KCD hemû komxebat, kongre û konferansên xwe aşkere kirine. Dixwazin KCD'ê bikin qurbanê konsepta nifrînê. KCD'ê hemû kongre û xebatên xwe aşkere kirin. FETO dosyayên KCK'ê wekî kumpas bikar anîn. Niha  jî AKP dixwaze dosyayên KCD'ê wekî kumpas bikar bîne. Em hişyar dikin ku yên dixwazin di ser KCD'ê re li ser Kurda kumpasê ava bikin bila dest ji van biryarên siyasî berdin. Yên îşkenceyê li jinan dikin, yên îşkenceyê diparêzin, bawer bikin tu carî sûcê xwe ji bîr nakin. Tê teqes rojekê hesabê vê yekê bidin. Ji ber vê yekê bi lez dawî li van pêkanînan bînin."

	 

	'EM JIN DÊ BIRYARÊ BIDIN

	 

	Gunay, anî ziman ku destûr nadin li dijî KCD'ê û TJA’yê kumpasê pêş bixin. Gunay li ser gotinên  Serokkomarê Tirk  Recep Tayyîp ku Peymana Stenbolê kiribû hedefa xwe got, ''Ji bo jinan çi  rast e çi şaş e em jin em ê biryarê bidin, hûn mêr nikarin biryarê bidin. Li gorî keyfa we rêxistin nabin fermî û dijfermî. Bi gotina ‘Em hatin xapandin' jî nabe. Dijberî vê yekê hûn her tim dixapîne. Hûn derewan dikin. Hûn mêr nikarin biryarê bidin. Bi hedefgirtina Stenbolê, dijminantiya jinan e. Ev gotin teşwîkkirina tundiya li dijî jinê ye. Ji ber ku tenê wateyek vê peymanê heye. Ew jî dawîlêanîna tundiya mêr e. Parastina mafê jinan e. Parastina wekheviya jin û mêr e. 

	 

	DIXWAZIN BAROYÊN ALÎGIR MEZIN BIKIN

	 

	Li ser teklîfa AKP-MHP'ê ya derbarê guherandina baroyan jî Gunay got: "Bi çavtirsandîkirina parêzerên muxalîf, bi krîmînalîzekirina wan, bi deqkirina wan a bi rengê xayin, terorîst, bi rêbazên ku nehêlin bibin endamên baroyan, em dizabin ku desthilat wê baroyên alîgir mezin bike.''

	 

	Gunay her wiha li ser zexta li ser medyaya sosyal a AKP-MHP'ê jî got armanca wan ew e ku nehêlin dengên muxalîf were bihîstin û nikaribin helwesta xwe li ser medyaya civakî aşkere bikin.

	 

	BERTEK NÎŞANÎ CEZAYÊN TV Û GIRTÎGEHAN DA

	 

	Gunay, cezaye ku RTUK'ê li Tele 1 û Halk TV'ê birîne jî rexne kir û wiha berdewam kir: "RTUK dengê xwe ji qanalên alîgirên AKP'ê yên ku bangên qetlîaman dike re nake. Lê qanalên ku îqtîdarê rexne dike bê wîcdan ceza dike. RTUK edî ne saziyek serbixwe ye. 

	 

	Guna, herî dawî bal kişand ser rewşa penaberên ku li Wanê û wiha bi dawî kir: "Wekî hûn dizanin penaberên ji Afganistan, Pakistan, Somalî, îran, Bangladeş û wehatên din tên û diçin Ewropa di Wanê re derbas dibin. Ji bo van penaberan tedbîr nayên girtin. Ev şerma mirovahiyê ye. Penaberên li Wanê jî wekî penaberên Sûriyeyê li dijî Ewropa wekî şandajê bikar tînin. Em dixwazin li dijî qaçakvaniya penaberan tedbîr ben girtin. Kengê we tedbir girtin wê demê hûn dikarin hindik be jî berpirsiyariya xwe pêk bînin.